អភិក្រមបែបពហុមណ្ឌល សម្រាប់គ្រប់គ្រងធនធានទឹកក្នុងទីក្រុងនៅអាស៊ីអាគ្នេយ៍

ការធ្វើមូលដ្ឋាននីយកម្មគោលដៅអភិវឌ្ឍន៍ប្រកបដោយចីរភាព (SDGs) និងរបៀបវារៈថ្មីនៃទីក្រុង នៅកម្រិតសហគមន៍

ចំណោទមួយសម្រាប់ទីក្រុងនៅអាស៊ីអាគ្នេយ៍ គឺត្រូវរិះរកវិធីសាស្ត្រថ្មីៗ ដើម្បីពង្រឹងភាពធន់ បរិយាបន្ន និងសន្តិសុខធនធានទឹក។ នៅតាមបណ្ដាស្រុកដែលស្ថិតនៅទីប្រជុំជន ការគ្រប់គ្រងធនធានទឹកគ្រប់ជ្រុងជ្រោយជួបប្រទះនឹងបញ្ហាប្រឈមសំខាន់ៗមួយចំនួន ដែលឆ្លុះបញ្ចាំងពីវិសាលភាពនៃបញ្ហាប្រឈមដែលពាក់ព័ន្ធនឹងការអភិវឌ្ឍទីក្រុង។ ការអភិវឌ្ឍទីក្រុងបានបង្ហាញឱ្យឃើញពីការខ្វះការផ្គត់ផ្គង់សេវា ពាក់ព័ន្ធនឹងធនធានទឹកនៅ ទីក្រុង និងស្ដែងឱ្យឃើញកាន់តែច្បាស់ពីការទាញប្រយោជន៍លើសលុបពីធនធានទឹក។ ក្រៅតែពីការបំពុលប្រភពទឹកលើដីក៏ជួបប្រទះនឹងបញ្ហាបន្ថែមទៀត ដូចជា ភាពងាយរងគ្រោះដោយសារការប្រែប្រួលអាកាសធាតុជាដើម។

គោលបំណងរបស់គម្រោង – តើយើងចង់សម្រេចអ្វីខ្លះ?

គម្រោង “PolyUrbanWaters” មានគោលបំណងបង្កើតនូវចំណេះដឹងវិទ្យាសាស្ត្រ និងអភិវឌ្ឍឧបករណ៍ផ្សារភ្ជាប់ជាមួយនឹងការអនុវត្ត ដែលផ្ដល់លទ្ធភាពឱ្យតំបន់ទីក្រុងដែលកំពុងមានការរីកចម្រើនយ៉ាងឆាប់រហ័សនៅអាស៊ីអាគ្នេយ៍ អាចយកអភិក្រមបែបពហុមណ្ឌល មកប្រើប្រាស់សម្រាប់អភិវឌ្ឍន៍ទីក្រុង និងគ្រប់គ្រងទឹកជាតាមបែបរួមគ្នាជាលក្ខណៈអន្តរវិស័យ។

តាមរយៈការធ្វើបែបនេះ “ធនធានទឹក” នឹងត្រូវដកចេញពីការគ្រប់គ្រងដែលផ្ដោតតែលើវិស័យតែមួយ (ជម្នះ “ផ្នត់គំនិតធ្វើការងារតែឯង”) និងចាត់ទុកជាបញ្ហាអន្តរវិស័យដែលពាក់ព័ន្ធនឹងការអភិវឌ្ឍទីក្រុង
តាមរយៈការធ្វើបែបនេះ នឹងមានការរួមចំណែកជាក់លាក់ដល់ការធ្វើមូលដ្ឋាននីយកម្មគោលដៅអភិវឌ្ឍន៍ប្រកបដោយចីរភាព (SDGs) នៃរបៀបវារៈឆ្នាំ ២០៣០ និងរបៀបវារៈថ្មីនៃទីក្រុង៖ “លើកទឹកចិត្តឱ្យមានកិច្ចសហប្រតិបត្តិការ និងការគាំទ្រដល់គ្នាទៅវិញទៅមកក្នុងចំណោមទីក្រុង និងតំបន់តាំងទីលំនៅដែលមានទំហំខុសៗគ្នា ពង្រឹងតួនាទីរបស់ទីក្រុង និងទីប្រជុំជនតូច និងមធ្យម ។ល។ ផ្ដល់លទ្ធភាពឱ្យប្រជាពលរដ្ឋអាចទទួលលំនៅដ្ឋានសមរម្យប្រកបដោយចីរភាព ព្រមទាំងហេដ្ឋារចនាសម្ព័ន្ធ និងសេវាកម្ម ដែលមានតម្លៃសមស្រប ធន់ និងមានសុវត្ថិភាព” (មាត្រា ៩៥ នៃរបៀបវារៈទីក្រុងថ្មី)

គោលដៅជារួមរបស់គម្រោង (២០១៨-២០២៥)៖ អភិក្រមបែបពហុមណ្ឌល សម្រាប់អភិវឌ្ឍន៍ទីក្រុង និងការគ្រប់គ្រងធនធានទឹកនៅតាមទីប្រជុំជន ដែលមានលក្ខណៈរួមចម្រុះ ជួយបង្កើនភាពធន់ អនាម័យ បរិយាបន្ន និងភាពទាកទាញនៃតំបន់ទីក្រុងនៅអាស៊ីអាគ្នេយ៍ ដែលរួមចំណែកដល់ការសម្រេចរបៀវារៈប្រកបដោយចីរភាពនៅនៅថ្នាក់ជាតិ និងថ្នាក់សកល។

> បច្ចុប្បន្នភាព និងព័ត៌មានលម្អិតអំពីគម្រោងអាចរកបានជាភាសាអង់គ្លេស តាមរយៈគេហទំព័រ

ដំណើរការផ្លាស់ប្ដូរនៅក្នុងទីក្រុងសាកល្បង

ទីក្រុងសាកល្បងចំនួនបី (“ទីកន្លែងពិសោធន៍-Living Labs”) នឹងត្រូវធ្វើឡើងនៅក្នុងប្រទេសចំនួនបី ដើម្បីសាកល្បងដំណើរការផ្លាស់ប្ដូរនៅកម្រិតមូលដ្ឋានផ្ទាល់ ដែលធ្វើឡើងដើម្បីប្រយោជន៍ដល់តួអង្គពាក់ព័ន្ធនៅក្នុងក្រុង។

Sleman, Indonesien

Kratié, Kambodscha

Sam Neua, Laos

នៅក្នុងតំបន់ប្រជុំជនទាំងនេះ បញ្ហាគ្រប់គ្រងធនធានទឹកគឺជាបញ្ហាដែលមានសារៈសំខាន់ និងឆ្លុះបញ្ចាំងពីបញ្ហាប្រឈមជាច្រើន។

នៅក្នុងទីក្រុងទាំងនេះ បច្ចុប្បន្ននេះកំពុងមានការរៀបចំអភិក្រមជាយុទ្ធសាស្ត្រ (ដំបូងៗ) សម្រាប់អនុវត្តសកម្មភាពដែលបានគ្រោងទុក។ តំបន់គោលដៅទាំងនេះមានប្រជាជនប្រមាណពី ៣.០០០ – ១៥.០០០នាក់ (ដូចជា នៅតាមសហគមន៍ តំបន់ជុំវិញក្រុងជាដើម) ដែលផ្ដល់លទ្ធភាពឱ្យគេអាចយកលទ្ធផលរកឃើញ និងឧបករណ៍ដែលបង្កើតពីគម្រោងនេះទៅអនុវត្តនៅតាមតំបន់ដទៃទៀត ដែលមានស្ថានភាពស្រដៀងគ្នានេះ។ លទ្ធផលដែលទទួលបាន និងវិធីសាស្ត្រដែលប្រើប្រាស់សម្រាប់ធ្វើការសាកល្បងនឹងត្រូវកែសម្រួលឱ្យស្របទៅតាមបរិបទការងារនៅថ្នាក់ជាតិ និងថ្នាក់តំបន់។

ចេញពីទស្សនៈយល់ឃើញកម្រិតនយោបាយ “គម្រោងគម្រូ” ទាំងនេះទទួលបានការគាំទ្រពីរដ្ឋបាល ក្រុង ក្រសួងអភិវឌ្ឍន៍លំនៅដ្ឋាន និងទីប្រជុំជន និងក្រសួងអភិវឌ្ឍន៍ហេដ្ឋារចនាសម្ព័ន្ធនៅក្នុងប្រទេសឡាវ សាលាខេត្តក្រចេះ នៃប្រទេសកម្ពុជា និងក្រសួងសាធារណការ នៃប្រទេសឥណ្ឌូនេស៊ី។

> ព័ត៌មានលម្អិតបន្ថែមទៀតអំពីទីក្រុងសាកល្បង អាចរកបានជាភាសាអង់គ្លេស លើគេហទំព័រ។

ទល្ធផលរំពឹងទុក

ចំណេះដឹងវិទ្យាសាស្ត្រ

ការបង្កើតនូវចំណេះដឹងវិទ្យាសាស្ត្រដែលមានលក្ខណៈគ្រប់ជ្រុងជ្រោយ ដែលមានប៉ារ៉ាម៉ែត្រពាក់ព័ន្ធនឹងការអភិវឌ្ឍទីក្រុងបែបពហុមណ្ឌល ដែលគិតគូពីបញ្ហាធនធានទឹក ដើម្បីប្រើប្រាស់ជាឧបករណ៍ដើម្បីផ្លាស់ប្ដូរទៅសម្រេចឱ្យបាននូវនិរន្តរភាពនៅកម្រិតក្រុង/មូលដ្ឋាន។

ឧបករណ៍សម្រាប់ធ្វើផែនការ

ការអភិវឌ្ឍឧបករណ៍នានាដែលផ្ដល់លទ្ធភាពឱ្យទីក្រុង និងអ្នកធ្វើសេចក្ដីសម្រេចចិត្តធ្វើផែនការទីក្រុងបែបយុទ្ធសាស្ត្រសម្រាប់អភិវឌ្ឍន៍ទីក្រុងបែបពហុមណ្ឌល។

សកម្មភាពសាកល្បង

ការរៀបចំ និងការអនុវត្តសកម្មភាពសាកល្បង ដែលផ្ដល់ការគាំទ្រឱ្យទីក្រុងអាចរៀបចំជាអភិក្រមគំរូសម្រាប់រៀបចំទីក្រុងតាមបែបអន្តរវិស័យ ដែលគិតគូរពីបញ្ហាធនធានទឹក

សេចក្ដីពិពណ៌នា

សេចក្ដីពិពណ៌នានៅក្នុងវិស័យសិក្សាធិការ នយោបាយ វិជ្ជាជីវៈ និងអន្តរវិស័យកាន់តែច្បាស់លាស់ នៅក្នុងតំបន់នេះ ដើម្បីគាំទ្រឱ្យមានការប្រើប្រាស់ “អភិក្រមបែបពហុមណ្ឌល ដែលគិតគូពីបញ្ហាធនធានទឹកសម្រាប់ធ្វើការអភិវឌ្ឍទីក្រុង និងគ្រប់គ្រងធនធានទឹកតាមបែបរួមចម្រុះ”

ការពង្រឹងសមត្ថភាព

អភិក្រមគ្រប់ជ្រុងជ្រោយសម្រាប់អភិវឌ្ឍន៍សមត្ថភាពជាយុទ្ធសាស្ត្រដែលផ្ដល់លទ្ធភាពឱ្យគេអាចធ្វើការផ្ដោះប្ដូរបទពិសោធន៍តាមខ្សែបណ្ដោយផង (រវាងវិស័យនានានៅកម្រិតក្រុង) ក៏ដូចជា តាមរយៈខ្សែបញ្ឈរ (ចែករំលែកបទពិសោធន៍រវាងសហគមន៍ជាមួយនឹងទីក្រុង ជាមួយនឹងរដ្ឋបាលនៅថ្នាក់ជាតិ)

គំរូថ្មី

ការកំណត់ទស្សនទាន ខ្លឹមសារ និងវិធីសាស្ត្រនៃគំរូ “អភិក្រមបែបពហុមណ្ឌល សម្រាប់អភិវឌ្ឍន៍ទីក្រុងដែលងាយស្រួលរស់នៅ ធន់ទៅនឹងអាកាសធាតុ និងមានការគិតគូពីបញ្ហាធនធានទឹកនៅអាស៊ីអាគ្នេយ៍”

ការផ្ដោះប្ដូរបទពិសោធន៍ដែលបានពីការសិក្សាស្រាជ្រាវ

ការបង្កើតនូវកម្មវិធីសិក្សាសម្រាប់អភិវឌ្ឍន៍ធនធានមនុស្សផ្ដោតលើការអនុវត្តជាក់ស្ដែងជុំវិញប្រធានបទ “អភិក្រមបែបពហុមណ្ឌល សម្រាប់អភិវឌ្ឍន៍ទីក្រុង និងគ្រប់គ្រងធនធានទឹកនៅក្នុងទីក្រុងតាមបែបរួមចម្រុះ” ក្នុងទម្រង់ជាកិច្ចសហប្រតិបត្តិការរវាងស្ថាប័នសិក្សាស្រាវជ្រាវនានានៅអាស៊ីអាគ្នេយ៍ និងនៅអាល្លឺម៉ង់។

បណ្ដាញស្រាវជ្រាវដែលផ្ដោតលើការអនុវត្តជាក់ស្ដែង – ដៃគូគម្រោង

គម្រោងនេះត្រូវបានអនុវត្តដោយបណ្ដាញស្រាវជ្រាវដែលផ្ដោតលើការអនុវត្តជាក់ស្ដែង ដែលមានសមាជិកជាស្ថាប័នសិក្សាស្រាវជ្រាវ សាលាក្រុង ទីភ្នាក់ងាររដ្ឋាភិបាលនៅថ្នាក់មូលដ្ឋាន និងថ្នាក់ជាតិ អង្គការសង្គមស៊ីវិល និងវិស័យឯកជនមកពីប្រទេសឥណ្ឌូនេស៊ី កម្ពុជា ឡាវ ថៃ វៀតណាម និងអាល្លឺម៉ង់។